| تبليغات | X |
کامیل قهرمان اوغلو
...و قانداللی قوْللاری سنه تاپشیردیم
سنه!
دار آغاجلاریندان گؤیهرهن
بدنسیز باشلاردان نه خبر؟!
چیغیریش تومورجوقلارین باغریندان سولان
کؤمور لحظهلردن،قان آغلا.
توفنگلرین،
گولوشون اوخشا بیزه... .
-ایندی
بوتون یوللارین جیغیری منیم اوتاغیمدان اوزانیر!
و شوشهلرده مورگولهین داشلاردان
سنی اؤسگورورهم .
آغزیمدا کی سرطان باخیشلی کلمهلر
آغیر آغریلاری
باغیریرامسا،
آرزیمی
قوزئیلردهکی قبیرلرین گؤلونه تاپشیرمیشام!
قایالاردا
هاراییمی چکیرلر
اینسان اتی سوواشان قیرمیزی داشلارا.
هئی...
بو قوللوق گونلرده
من سنین تانری تانیماز غضبین!
وسنده منیم
یومروقلاریمدا بوغولان
«قیشقیریق».
