شکیل چکن:دانسو پاشازاده

زامان پاشازاده

بئینیم،

 قوللوقچو چیراغینین قولودور

بیر تومارلا قوْلو باغلی قوُللوغوندادیر دئولرین. 

اوره‌ییم

اوزونتولری‌نین ائوی‌دیر!

اونلار دوُیور من‌سه اوزولوره‌م.

اللریم،اللریمدن آلینمیش

و بارماق ایزلریم

بوتون زامانلاردان و مکانلاردان منیمسه‌نیب.

گؤزلریم، بیر بارماقدان آسیلی‌دیر

یؤن اوندان

 و آیدین گله‌جکلرین ایلغیمیندا کور اولماق مندن.

گؤوده‌م‌سه

آلینماز بیر قالایا چئوریلمیش!

ومن آزدیریلمیش بیر روح کیمی دولاشیرام،

                           اؤز گؤوده‌مین چئوریسینده!.

بیرتانریسال سسین یوخلوغوندان،

هر داغین باشیندا قول بودانمیش،

دارتیم-دارتیم اﯚیودولموشم.

آدیملا چاغیریلمام بیر خایال

ذرّه ذرّه دوغرولمام بیر یالان.

آهئ‍...ی تانریم!

منیم دردیم آیری سئچگیلیک دئییل

منیم دردیم

          یوخ سانیلدیغیم‌دیر.