گله‌‌جک بیر گون

یاشار اولدوز

گله‌جک بیر گون،

        آچاجاق شه‌هرین دومان قاپیسین!

قان دامجی‌لی شافاق

           سؤکوله‌جک آرخاسیندا!

گله‌جک

        اَینینده آیین گوموش کؤینگی،

و چیل کپنکلرین

         گول یوخوسوندان اویانمیش اللرینده

                                      زیتون بوداقلاری.

و مینلرجه شهیدین لاختالانمیش قانی، دوداقلاریندا!

        منه

             اؤپوش گتیره‌جک

                              بیر قیز.

ومن

عؤمور بویو ایشیق قوخلایاجاغام

                 ساچلارینین قارانلیغیندا،

و گؤزلرینده کؤپوکله‌نن اسگی چاخیری

                       باشیما چکه‌جه‌یم

                                ده‌لیجه‌سینه!.

بو قیز

هر آخشام سه‌هه‌نگی گؤزلریمده سینان

               -«سودان گلن سورمه‌لی قیز»-

و ماهنیلارین اوره‌یینده اومود:

                  -«یار بیزه قوناق گله‌جک.»-

بو ماهنی

وورغون اوره‌کلرین دالداسیندا،

                              سورگون حسرت .

بو حسرت آزادلیق

بو حسرت حورّیت...