زامان پاشازاده

گئجه 

ساعاتیمی قورموشدوم تکرارلاریما

قان بویالی بیر کابوس‌لا قول بویونلوغومدا

بیرآدام،

تبریزین ساعاتینین سارقاجیندان آسلانمیشدی

ساعاتین عقربی شافاقدا تیتره‌ک ،

اونون گؤزلرینده

دان یئری آغاریردی .

بوتون پولیس تئلئفونلاری ایشغال

دوستاق

بوراسی شوشه دووارلی بیر دوستاق
زهرلی گؤزلرین سوزگجینده
دمیر بارماغ‌لیق‌لار سایاق دوزولن اینسان‌لار دوستاغیندا
سیناق سیچانلاریییق بیز.

جان سوموروجو سئروم‌لار
و قان امیجی قام‌چی‌لار سیناغین‌دان کئچیریلیریک.
باشیمیزدا دوه دری‌سی
و یادداشیمیزدا تیکان تیکان بئینیمیزه یئدیزدیریلن اؤلوم.
جانیمیز یولوخوجو خسته‌لیک‌لر یئمی
و قانیمیز دونیانی دیزه چؤکدورن ائپیدئمی.

اورمو

سئوگی دوزلاغیندا

آددیم‌لاریم دوغما شهرین پیچیلتی‌سیندا

ایلان‌لارین سئویشمه‌سی کیمی سس‌سیزدیر

یاشام‌لاری قدر قورخونج

آلیشدیم

سس و شئعیر : عیسی زینی

 دینله یین

زامان پاشازاده

بیر گون ،

تانری اؤزویله شاهمات اوینایاندا

بیر سنی یاراتدی بیر منی

آغ،قارا

آغ ائولر،قارا ائولر

اوردو قوردوق قارشیتلاریمیزلا

قالالار سالدیردیق

یاراقلاندیق

و یاشاماق باشلاندی قارالاردا و آغلاردا.

ایلک کره،

اوخو یاییندا داریخمیش

بیر جوت عسگرینه توش گلدیم.

او گؤزلرینین

سارسیدیجی سالدیریسی‌یلا باشلادی هر شئی.

کامیل قهرمان اوغلو

آرمود یاشیللیغینا آخیردی گونئی!

آلما آلیشماسینا،

بیر قاریشقانین گؤزونده اوشاغا قالدی او!

بیردوغوزون باخیشیندا،

اؤپوش-اؤپوش مچیدلری یالادی!

وآسلاندی قیفیللاردان.

گؤز یاشیندان پیغمبر آخدی

…و تانری سؤیودلری ساغینا وئردی.

ووه…الله اکبر!

عیسی زینی

ایله‌شیرسن آرابادا

و من

  چوخالیرام

       هرصاباح

   ایکی گوزگو آراسیندا

               آغ گوزگو

                       قارا گوزگو.

...سوروره‌م ده‌لیجه‌سینه

هئچ قارشییا باخمادان!

قیرپما گؤزلرینی

             ...هلاک اولوروق!.

کامیل قهرمان اوغلو

...و قانداللی قوْللاری سنه تاپشیردیم

                                          سنه!

دار آغاجلاریندان گؤیه‌ره‌ن

                    بدن‌سیز باشلاردان نه خبر؟!

چیغیریش تومورجوقلارین باغریندان سولان

                      کؤمور لحظه‌لردن،قان آغلا.

توفنگ‌لرین،

     گولوشون اوخشا بیزه... .

شکیل چکن:دانسو پاشازاده

زامان پاشازاده

بئینیم،

قوللوقچو چیراغینین قولودور

بیر تومارلا قوْلو باغلی قوُللوغوندادیر دئولرین. 

اوره‌ییم

اوزونتولری‌نین ائوی‌دیر!

اونلار دوُیور من‌سه اوزولوره‌م.

اللریم،اللریمدن آلینمیش

و بارماق ایزلریم

 بوتون زامانلاردان و مکانلاردان منیمسه‌نیب.

گؤزلریم، بیر بارماقدان آسیلی‌دیر

یؤن اوندان

  و آیدین گله‌جکلرین ایلغیمیندا کور اولماق مندن.

عیسی زینی

سن گئدیرسن!

         سویوناراق یاشامینی آنیلارا.

سن گئدیرسن!

         یویوناراق غوربتینی روژ لکه‌لی شافاقلارا.

سن بو یولون گؤوشه‌یی‌سن .

و بیلیرسن حسرتینین مئتراژینی

و سئویرسن او آغ بیرچک،

                 او تومانچاق

                           سئودالارین سوچلارینی!.         

 یاشار اولدوز

گله‌‌جک بیر گون

گله‌جک بیر گون،

        آچاجاق شه‌هرین دومان قاپیسین!

قان دامجی‌لی شافاق

           سؤکوله‌جک آرخاسیندا!

گله‌جک

        اَینینده آیین گوموش کؤینگی،

و چیل کپنکلرین

         گول یوخوسوندان اویانمیش اللرینده

                                      زیتون بوداقلاری.

و مینلرجه شهیدین لاختالانمیش قانی، دوداقلاریندا!

توکّل کیانی اصل(کیان خیاو)

اؤنو سونسوز

سونو اؤنسوز بير يئرده‌يم

آخاريندا

اؤلو بير قودوز پيشيگين ايچ آلاتي

                       ايگرنج

باخاريندا

ساري سالدات‌لار چنبري

                     قورخونج.

آغاج‌لاري وار آسيلديغيم

بوداق‌لاري چاتي اعدام موثلثي.

چاي‌لاري وار بوغولدوغوم

دالغالاري دمير تور داييره‌سي.

شعیر : زامان پاشازاده

1

یاشاماق یاش آرتماق دئییل

یاشاماق،

یا چیچک دن چیچه یه قانادلاریندا اؤپوش آپارماق،

یا قاناد سیزجا حایات سویوندا قایناییب،

اسمر بیر قادینین پالتاریندا قانادلانماق دیر

یاشاماق یاش آرتماق دئییل

یاشاماق یاشاتماق دیر.

کامیل قهرمان اوغلو

باشلارلا اؤپوشن قیلینجلاردان

              گؤیردی بارماقلار.

و بوغازلار

           آرخالانمیشدی دار آغاجینا!

اینیلتی کوچه‌لر

         فاتحه سوره‌سینه بورونموشدو!

و گوزگولردن

توستو کؤهره‌سی بیتن زامان،

تانری مین گؤزویدو

                بو فاجیعه‌لره.

شیطان قوشونا کؤلگه‌له‌نن

        قیزیل قیرقی‌لار،

           میندار اؤلولرین آلنینا  

              میندارلیق قیشقیریغی چکیردی هئی...!

علی انواری

1

آمان سئوگیلیم

گؤزلرینین بیر آخشام اوستو چاغیندا!

دنیز شه‌هه‌رین باشینا اوچان زامان!

من اؤزومو...

ایسلاق ساچلارینین اوجوندان آساجاغام !

بلکه بوغولمایام...!!

2

آرخانجا باخدیم

دووارین آرخاسیندان بویلاناراق.

دؤنوب باخمادین!

زامان پاشازاده

ناققالارین گؤزونده ن ایراق

بوتایدان باتیب او تایدان چیخماق

و سیخ اورماندا ایسلاق پالتارینی گونش چیویسینده ن آسلاماق

وقوللارینی دورد بیر یانا آچیب اوزگورجه باغیرماق

قارلی داغلارین سیجاق سالامینی

دنیز دالغالارینا آشیلاماق

قاچاق-قاچاق

گیزلی سئوگی

اوره یینجه دیر می؟

توکّل کیانی اصل(کیان خیاو)

منيم ايشيم

اوشاق ـ موشاق ايشي دئييل.

گؤرر ـ گؤرمز

آياغينا قالخارام اولو عشقين

و دوشمانلار اؤنونده

تاپانچامين ياغي چيچک قوخويار.

گؤزلريمده بوز آللانير شافاقلار

سؤزلريمده، ساري ياشيللانير آغاجلار.

چيله­دن چيخماز کؤنلوم.

آمما ده­رين باخسان،

گونشده ده آیاغیمین ایزلری وار.

زامان پاشازاده

داللانمیش،بودانمیش بیر آغاجام.

اوجون توتوب اوجوزلوغا اوجالمیش

                                     بیرآغاج!

نه کندیر باغلاناجاق  بوداغیم وار ،

نه یاشام دویوراجاق یارپاغیم.

کؤکوم هارداسا اونودوب منی

و جالافلانیب یئلپه ‌نکلرکؤتویونه!

و سن؛

اته ‌ییمده پورپاق چرته‌رک

           جوجه‌ریرسن چیچک-چیچک.

هله بللی دئییل

قوش اکمه‌یی‌می‌سن!

چینارمی‌سان!

توستولو یاماجلاردا

 گئجه‌‎نی گؤزله‌ییر گونش .

بیر قیسیر ده‌میر یولودا،

                          سنی!   

داها منده بیر آرخایین باخیش،

               ساچلارینی هؤرمور.

قاطارین شاشقین فیشقیراغی،

                 اپریمیش باغریمین

                          ساپاغین اوزور!

کامیل قهرمان اوغلو 

بیر رؤیانین بولودلوغون دانیشدی گؤیلر

و گونش یاناغینی،

دنیزه یودو

ساچلارین

قیلینج‌لارا اؤپوش یوللادی و...

من،

داللانمیش آغاج

وقارا ماهنیلارا دؤنموش بیر جسد

دومانلاری ایچدیم، یاماج-یاماج

گؤزلریمده،

 سو سوناسی‌نین سئوداسی

و باشیمدا آغیر بیر هاوا

اینامین آیاغین اوستومه

آچدیم

آردی وار=>

قورخاق توسباغا تک

داغلارین آردیندا

قینیندا گیزلنمیش گونش،

و گئجه زهرلی ایلان تک

قویروغو داغلارین آردیندا

باشی پنجره مده ،

آه...

گونش بو ایلانی یئینجک

منه ده ین ده یه جک

                                            ائو ۱۳۸۶ دی آیی

ائلشن بؤيوك وند

ماغارالار دوواریندا رسم اولوب

حبس اولونموشلارا اوخشايان قوجانین

دویغوسوندایام.

یوخوشلارا تامارزی داشلار

کول قابی لار دوشر گه سی نین دوشگونلری

ایکی تونقال یانیر  داغ باشیندا

ایکی تونقال.

چلیک له

قارا بولودلار اوردوسونا واریب

چاخناشیب چاققیلداشیب

ساریلیغا دوستاق تورپاغا یاغیب

گؤیه ره جه یم می ؟

آردی وار=>